ខ្ញុំមានបិតិសោមន្សរីករាយ និងសុទិដ្ឋិនិយមយ៉ាងក្រៃលែងសូមឆ្លៀតឱកាសនេះបង្ហាញជូន សៀវភៅផលិតផលសក្តានុពលកម្ពុជា គឺជាសៀវភៅថ្មីមួយក្នុងចំណោមសៀវភៅជាច្រើន ដែលបានបោះពុម្ពរួច សំរាប់គាំទ្រដល់សហគមន៍អ្នកជំនួញ និង សាធារណៈជនទូទៅ។
បច្ចុប្បន្ននេះ សកលភាវូបនីយកម្ម និងតាមតំបន់មួយចំនួនក្នុងពិភពលោក មានការប្រែប្រួលយ៉ាងឆាប់រហ័ស ការប្រគួត ប្រជែងគ្នាដណ្តើមយកវិនិយោគ ដោយផ្ទាល់ពីបរទេស មានវិសាលភាពយ៉ាងធំធេង ហើយចារកម្មសេដ្ឋកិច្ច និងព៍ត៌មាន ពាណិជ្ជកម្ម បានក្លាយទៅជាឧបករណ៍ ដ៏មានសារៈសំខាន់ សំរាប់អ្នកដែលមានតួរនាទី អាចសំរេចកិច្ចការអ្វីមួយបាន។ ការបោះពុម្ពផ្សាយនាពេលនេះបានរាប់បញ្ចូលពីប្រវត្តិផលិតផលសំខាន់ មានដូចជាផលិតផលសូត្រខ្មែរ ថ្មម៉ាប ទឹកឃ្មុំ ស្រាក្រហម ទឹកត្រី និងត្បូងថ្មមានតំលៃជាដើម។
ជាការពិតណាស់ ព្រះរាជាណាចក្រកម្ពុជា ទទួលបានបទពិសោធន៍ នៃការអភិវឌ្ឍន៍សេដ្ឋកិច្ចជាតិ ប្រកបដោយ មោទនភាព នាប៉ុន្មានទសវត្សរ៍ចុងក្រោយនេះ មិនត្រឹមតែបានបង្កីតការងារជាច្រើន ធ្វើអោយមានកំណើប្រាក់ចំណូលប្រចាំ គ្រួសារ និងកាត់បន្ថយបានជាបណ្តើរៗអត្រានៃភាពក្រីក្រប៉ុណ្ណោះទេ ប៉ុន្តែថែមទាំងបានបង្ហាញអោយឃើញមានកំណើន
ផលិតផលថ្មីៗជំនួសអោយផលិតផលនាំចូលពីបរទេសបានយ៉ាងច្រើន។ ផលិតផលប្លែកៗទាំងនេះមិនត្រឹមតែ បានទាក់ទាញ ធុរជនប ឬ អ្នកវិនិយោគទុនបរទេស អោយមានការចាប់អារម្មណ៏ប៉ុណ្ណោះទេ ប៉ុន្តែផលិតផលទាំងនោះគឺជាធនធានដ៏សំខាន់ សំរាប់អភិវឌ្ឍន៍សេដ្ឋកិច្ចកម្ពុជានាពេលអនាគត។
ដើម្បីនាំផ្លូវអ្នកវិនិយោគទុន ធុរជន ឬ អ្នកនាំចេញទាំងក្នុង និងក្រៅប្រទេសអោយឃើញពីឬសគល់នៃផលិតផល សក្តានុពលកម្ពុជា ក្រសួងពាណិជ្ជកម្មបានចាប់ផ្តើមពិនិត្យអង្កេតយ៉ាងយកចិត្តទុកដាក់លើផលិតផលសក្តានុពល ១០ មុខក្នុងទូទាំងប្រទេស។ ព័ត៌មាន និងទិន្នន័យ ដែលយើងទទួលបាននពីការអង្កេតនោះបានសង្ខេបទៅក្នុង សៀវភៅផលិតផល សក្តានុពលកម្ពុជា ដោយបានបង្ហាញជូនអ្នកអានទូទៅពីប្រភព និងទីតាំងផលិតផលរបស់ខ្មែរផងដែរ។
ខ្ញុំសង្ឃឹមយ៉ាងមុតមាំថា សៀវភៅផលិតផលសក្តានុពលកម្ពុជា នេះនឹងផ្តល់ជូនមិត្តអ្នកអាននូវព័ត៌មានល្អៗ និងផ្តល់ឱកាសពាណិជ្ជកម្មជូនពាណិជ្ជករ សិប្បករ អ្នកនាំចេញ-នាំចូល ឬ អ្នកវិនិយោគទុនជាក់ជាមិនខាន។
ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម
ចម ប្រសិទ្ធ